აფხაზეთის ა/რ განათლებისა და კულტურის მინისტრად გიორგი ძაძამია დაინიშნა.

მინისტრი აფხაზეთის ა/რ მთავრობის თავმჯდომარემ სამინისტროს თანამშრომლებს პირადად წარუდგინა.

გიორგი ჯინჭარაძემ გიორგი ძაძამიას გამოცდილებას გაუსვა ხაზი და ახალი მინისტრის პირობებში განათლების მიმართულების გაძლიერებასა და სამომავლო ხედვებზე ისაუბრა.

გიორგი ძაძამია 1989 წლის 25 აგვისტოს სოხუმში დაიბადა. დაამთავრა ივანე ჯავახიშვილის სახელობის თბილისის სახელმწიფო უნივერსიტეტის სოციალური და პოლიტიკური მეცნიერებების ფაკულტეტი, ასევე პოლიტიკის თეორიების სამაგისტრო პროგრამა.

მას საჯარო სექტორში ხანგრძლივი მუშაობის გამოცდილება აქვს. მუშაობდა საქართველოს თავდაცვის სამინისტროში სხვადასხვა პოზიციაზე. მინისტრად დანიშვნამდე იყო აფხაზეთის ავტონომიური რესპუბლიკის მთავრობის აპარატის უფროსი.

შეგახსენებთ, რომ აფხაზეთის ა/რ განათლებისა და კულტურის მინისტრის თანამდებობას ბექა ღვაჩლიანი იკავებდა.