აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტრო აგრძელებს აფხაზეთიდან იძულებით გადაადგილებული პირებისთვის მხედველობის დაავადებათა დიაგნოსტიკისა და მკურნალობის პროგრამის განხორციელებას.

ქვეპროგრამის ფარგლებში ფინანსდება 18-დან 40 წლამდე ასაკის ბენეფიციართა თვალის საშუალო და მაღალი ხარისხის რეფრაქციული ანომალიების (ახლომხედველობა, შორსმხედველობა, ასტიგმატიზმი) ექსიმერული ლაზერით კორექცია, ექიმ-სპეციალისტის კონსულტაციისა და წინასაოპერაციო კვლევების საფუძველზე.

პროგრამაში ჩასართავად საჭიროა განცხადების წარდგენა და შემდეგი დოკუმენტაციის წარმოდგენა:

ჯანმრთელობის მდგომარეობის შესახებ ცნობა;

სამედიცინო დაწესებულების მიერ გაცემული ფინანსური დოკუმენტაცია ასანაზღაურებელი თანხის მითითებით;

პირადობის დამადასტურებელი დოკუმენტის ასლი;

იძულებით გადაადგილებული პირის (დევნილის) სტატუსის დამადასტურებელი დოკუმენტის ასლი;

არსებობის შემთხვევაში, პრიორიტეტულ ჯგუფს მიკუთვნებული პირის სტატუსის დამადასტურებელი დოკუმენტის ასლი.

18 წლამდე ბენეფიციარებისთვის დამატებით საჭიროა:

დაბადების მოწმობა;

მშობლის ან კანონიერი წარმომადგენლის პირადობის დამადასტურებელი დოკუმენტის ასლი.

დამატებითი ინფორმაციის მიღება შესაძლებელია აფხაზეთის ავტონომიური რესპუბლიკის მთავრობის ერთიან ელექტრონულ პორტალზე: portal.abkhazia.gov.ge

განაცხადის შესავსებად მოქალაქეებმა უნდა მიმართონ აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს.

პროგრამაში ჩართვა შესაძლებელია წლის განმავლობაში ნებისმიერ დროს.