„აფხაზეთი ჩვენი ორგანული ნაწილია. ჩვენ კარგად გვესმის, რამდენად მნიშვნელოვანია აფხაზური იდენტობისა და კულტურის შენარჩუნება. ეს უნდა ესმოდეთ თავად აფხაზებსაც და არავის უნდა მისცენ უფლება, გამოიყენონ ისინი საკუთარი ინტერესებისთვის’’ - ამბობს საქართველოს მეცნიერებათა ეროვნული აკადემიის აკადემიკოსი ვაჟა ლორთქიფანიძე, რომელიც დღეს ჩვენი პროექტის „მიამბე აფხაზეთზე“ სტუმარია.

იგი გულწრფელად იხსენებს ბავშვობისა და ახალგაზრდობის წლებს, აფხაზურ ტრადიციებსა და იმ მეგობრებს, რომლებთანაც დღემდე ინარჩუნებს თბილ და გულითად ურთიერთობას.

ვაჟა ლორთქიფანიძე, რომელიც 1998–2000 წლებში მთავრობის ხელმძღვანელი გახლდათ, როგორც სახელმწიფო მინისტრი მონაწილეობდა მოლაპარაკებებისა და ნდობის აღდგენის პროცესში. იგი დარწმუნებულია, რომ მიუხედავად მომხდარი დაპირისპირებისა, საერთო ენის გამონახვა გარდაუვალია.