აფხაზეთის საინფორმაციო-ანალიტიკური ცენტრის პროექტი „გაკვეთილი აფხაზეთი“ ბათუმის №2 საჯარო სკოლაში ჩატარდა.

ღონისძიებას აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე დაესწრო, რომელიც ახალგაზრდებს განათლებისა და ეროვნული თვითშეგნების გაძლიერების პროცესში მსგავსი პროექტების მნიშვნელობაზე ესაუბრა.

მოსწავლეებმა აფხაზეთის ისტორიის, კულტურის, კონფლიქტის ქრონოლოგოგიის და ომის გმირების შესახებ ცენტრის მიერ მომზადებული დოკუმენტური ვიდეომასალა იხილეს, რომელიც საინფორმაციო-ანალიტიკური ცენტრის დირექტორმა, ეკა წივწივაძემ წარადგინა.

წელს „გაკვეთილი აფხაზეთი“ საპილოტე რეჟიმში ხორციელდება. პროექტი ქვეყნის მასშტაბით 100 სკოლას მოიცავს და მასში 5,000-ზე მეტი მოსწავლეა ჩართული.

პროექტის მიზანია მოსწავლეებმა მიიღონ სრულყოფილი, ობიექტური და მრავალმხრივი ინფორმაცია აფხაზეთის შესახებ – მისი ისტორიისა და თანამედროვე რეალობის ჩათვლით.