აფხაზეთიდან დროებით დევნილი ახალგაზრდების პროფესიული, შემოქმედებითი განვითარების ხელშეწყობის და ეკონომიკური გაძლიერების მიზნით პროექტი "შემოქმედებითი ზაფხული" მიმდინარეობს.

პროექტი აფხაზეთის კულტურის, სპორტის და ახალგაზრდულ საქმეთა სააგენტოს ორგანიზებით, ილორის წმინდა გიორგის სახელობის ეკლესიის საკვირაო სკოლასთან და კოლეჯ „სპექტრთან“ ურთიერთთანამშრომლობის ფარგლებში ხორციელდება.

ქართული კალიგრაფიის მასტერკლასის ფარგლებში – მონაწილეები პროფესიონალი კალიგრაფის ლეილა ბაღბაიას ხელმძღვანელობით ეცნობიან ქართული კალიგრაფიის ხელოვნების სხვადასხვა ტექნიკას , სწავლობენ ქართულ ხელნაწერთა ტრადიციებს და კალიგრაფიულ ხელსაწყოებთან მუშაობის ძირითად პრინციპებს.

რაც შეეხება კერამიკის ხელოვნების მასტერკლას, რომელიც მრავალპროფილიან პროფესიულ სასწავლებელში, კოლეჯ „სპექტრ“ -ში ხორციელდება, პროფესიონალი კერამიკოსი გრიგოლ მუმლაძე ხელმძღვანელობს, რომელიც პროექტში ჩართულ დევნილ ახალგაზრდებს კერამიკული ნივთების დამზადების ტექნიკას ასწავლის და საკუთარი ხელით აფხაზური თემატიკის ნამუშევრების შექმნაში ეხმარება.

ორივე მიმართულებით სასწავლო კურსის დასასრულს შემაჯამებელი გამოფენა გაიმართება, სადაც პროექტის მონაწილე ახალგაზრდები მასტერკლასების ფარგლებში შექმნილი ნამუშევრების გამოფენას შეძლებენ.