თბილისში, ილორის წმინდა გიორგის სახელობის ტაძრის საკვირაო სკოლის მოსწავლეებს აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე შეხვდა და ის პროგრამები გააცნო, რომლებიც აფხაზეთიდან დევნილი ახალგაზრდებისთვის სხვადასხვა მიმართულებით ხორციელდება.

მთავრობის თავმჯდომარემ და ტაძრის წინამძღვარმა, მამა ლევან ჯანაშიამ ახალგაზრდების ხელშეწყობის განსაკუთრებულ მნიშვნელობაზე ისაუბრეს და მთავრობისა და მისი სამინისტროების სხვადასხვა პროექტებში ახალგაზრდების ჩართულობის აუცილებლობას გაუსვეს ხაზი.

შეხვედრას აფხაზეთის განათლებისა და კულტურის მინისტრი ბექა ღვაჩლიანი და იუსტიციისა და სამოქალაქო ინტეგრაციის მინისტრი ალიონა ჩხოტუა ესწრებოდნენ, რომლებმაც კიდევ ერთხელ აღნიშნეს, რომ ახალგაზრდებისთვის საგანმანათლებლო, კულტურული და ინტეგრაციული პროგრამების ხელშეწყობა მთავრობის ერთ-ერთ მთავარ პრიორიტეტად რჩება.