ქუთაისში შერვაშიძის ქუჩაზე დევნილთა კომპაქტურ ჩასახლებაში მცხოვრებ, აფხაზეთიდან დევნილ მოსახლეობას უფასო სამედიცინო გამოკვლევები ჩაუტარდათ.

სამედიცინო აქციის ფარგლებში დევნილ ბენეფიციარებს, შესაძლებლობა ქონდათ თბილისის წამყვანი კლინიკების, მაღალკვალიფიციური ექიმებისგან მიეღოთ კონსულტაცია. ჩაეტარებინათ სხვადასხვა პროფილის, როგორც ამბულატორიული ასევე ექოსკოპიური კვლევები. დევნილ ბენეფიციარებს დანიშნულების შესაბამისად უფასო მედიკამენტებიც გადაეცათ.

უფასო სამედიცინო აქცია აფხაზეთის ა/რ მთავრობის მხარდაჭერით და აფხაზეთის ჯანმრთელობისა და სოციალური დაცვის სამინისტროს ორგანიზებით გაიმართა, რომლის მიმდინარეობასაც აფხაზეთის ა/რ მთავრობის თავმჯდომარე გიორგი ჯინჭარაძე, აფხაზეთის ჯანმრთელობისა და სოციალური დაცვის მინისტრ ბესიკ კუსიდთან ერთად გაეცნო.

გიორგი ჯინჭარაძის თქმით დევნილი მოსახლეობის ჯანმრთელობაზე ზრუნვა და სამედიცინო სერვისების ხელმისაწვდომობა, აფხაზეთის მთავრობის ერთ-ერთი უმნიშვნელოვანესი პრიორიტეტია. სწორედ ამიტომ მგავსი ტიპის უფასო სამედიცინო კვლევები მთელი საქართველოს მასშტაბით მომავალშიც აქტიურად გაგრძელდება.