აფხაზეთის ავტონომიური რესპუბლიკის მთავრობის ორგანიზებით და საქართველოს კულტურის სამინისტროს მხარდაჭერით, ზუგდიდში, დადიანების სასახლის ეზოში „აფხაზეთობის“ კვირეული გაიმართა.

ღონისძიება აფხაზური კულტურის, ტრადიციებისა და საერთო ეროვნული ღირებულებების წარმოჩენას მიეძღვნა. კვირეულის ფარგლებში გაიმართა დევნილი მხატვრების პლენერი, ფოტოგამოფენა, ხელნაკეთი ნივთების გამოფენა-გაყიდვა, საბავშვო და კულინარიული აქტივობები. სტუმრებს ასევე შესაძლებლობა ჰქონდათ დაეტოვებინათ სამშვიდობო გზავნილები.

კვირეული გალა-კონცერტით დასრულდა, სადაც მონაწილეობდნენ ანსამბლები „შავნაბადა“, „ჩელა“, „ოდოია“ და სხვა შემსრულებლები, რომლებმაც მაყურებლის წინაშე მრავალფეროვანი მუსიკალური პროგრამა წარადგინეს.

ღონისძიებაზე სიტყვით გამოვიდა გიორგი ჯინჭარაძე, რომელმაც „აფხაზეთობის“ მნიშვნელობასა და კულტურული ერთიანობის გაძლიერების აუცილებლობაზე ისაუბრა.

„აფხაზეთობა“ 2014 წლიდან ყოველწლიურად აღინიშნება და აფხაზური კულტურული მემკვიდრეობის შენარჩუნებასა და პოპულარიზაციას ემსახურება.