აფხაზეთის ა.რ. საინფორმაციო-ანალიტიკური ცენტრი მწუხარებას გამოთქვამს ცნობილი ქართველი ისტორიკოსის, მეცნიერებათა დოქტორისა და პროფესორის, ოთარ ჟორდანიას გარდაცვალების გამო.

ოთარ ჟორდანია 1940 წელს ოჩამჩირის რაიონის სოფელ მოქვში დაიბადა. წლების განმავლობაში იგი აქტიურად ეწეოდა სამეცნიერო და საგანმანათლებლო საქმიანობას და მნიშვნელოვანი წვლილი შეიტანა ქართული ისტორიოგრაფიის განვითარებაში.

იგი 130-ზე მეტი სამეცნიერო პუბლიკაციისა და მონოგრაფიის ავტორია, რომელთა დიდი ნაწილი საქართველოს ახალი და უახლესი ისტორიის საკითხებს ეძღვნება.

1993-2005 წლებში ოთარ ჟორდანია სოხუმის სახელმწიფო უნივერსიტეტის რექტორი იყო. რთულ პერიოდში მან უნივერსიტეტში სასწავლო და სამეცნიერო პროცესის უწყვეტობა უზრუნველყო.

პროფესორი ოთარ ჟორდანია ასევე გახლდათ ცხუმ-აფხაზეთის მეცნიერებათა აკადემიის დამფუძნებელი და პირველი პრეზიდენტი, საქართველოს ისტორიკოსთა კომიტეტის ვიცე-პრეზიდენტი და პროექტის - „აფხაზეთი - ჩვენი სამშობლო“ - აქტიური მონაწილე.

მისი პროფესიონალიზმი, პრინციპულობა და სამშობლოსადმი ერთგულება მომავალ თაობებს ღირსეულ მაგალითად დარჩება.

აფხაზეთის ა.რ. საინფორმაციო-ანალიტიკური ცენტრი თანაუგრძნობს ბატონი ოთარის ოჯახს, ახლობლებსა და კოლეგებს.