აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე მეუფე შიოს სრულიად საქართველოს კათოლიკოს-პატრიარქად არჩევას სოციალურ ქსელში ეხმაურება.

მისი განცხადებით, მეუფე შიოს არჩევა განსაკუთრებული მნიშვნელობის მოვლენაა როგორც ქართული ეკლესიისთვის, ისე სრულიად საქართველოსთვის და წარმოადგენს იმ სულიერი გზის გაგრძელებას, რომელიც წლების განმავლობაში უწმინდესმა და უნეტარესმა ილია II-მ შექმნა.

„გვწამს, რომ თქვენი ლოცვა-კურთხევითა და სულიერი მხარდაჭერით საქართველო გამთლიანებასა და აფხაზეთთან დაახლოებას შეძლებს. დარწმუნებული ვართ, ღირსეულად გააგრძელებთ ილია მეორის დიდ სულიერ მემკვიდრეობას, რომელიც ეროვნული ერთიანობის, მშვიდობის, შემწყნარებლობისა და ქართული იდენტობის დაცვის სიმბოლოდ იქცა. ვულოცავ ამ მნიშვნელოვან დღეს სრულიად საქართველოს, ქართულ ეკლესიასა და თითოეულ ქართველს. ღმერთმა დალოცოს საქართველოს ეკლესია, მისი ახალი სულიერი წინამძღოლი და გაამთლიანოს ჩვენი ქვეყანა“, - აღნიშნავს გიორგი ჯინჭარაძე.