ქართული ენის დღესთან დაკავშირებით, საქართველოს განათლების, მეცნიერებისა და ახალგაზრდობის სამინისტროს ინიციატივით, 14 აპრილს სპეციალური ღონისძიება გაიმართა.

ღონისძიება გახსნა მინისტრის მოადგილე ზვიად გაბისონიამ, რომელმაც დამსწრე საზოგადოებას მისასალმებელი სიტყვით მიმართა და სახელმწიფო ენის დღე მიულოცა. სიტყვით გამომსვლელებმა ყურადღება გაამახვილეს ქართული ენის განსაკუთრებულ მნიშვნელობასა და მისი დაცვისა და განვითარების აუცილებლობაზე.

ღონისძიებას ესწრებოდნენ აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია, ასევე აღმასრულებელი, საკანონმდებლო და სამეცნიერო წრეების წარმომადგენლები.

აღინიშნა, რომ 14 აპრილი უკავშირდება 1978 წლის მოვლენებს, როდესაც საზოგადოების ერთიანობის შედეგად ქართული ენის სახელმწიფო სტატუსი შენარჩუნდა. აღნიშნული თარიღი საქართველოში ყოველწლიურად საზეიმოდ აღინიშნება.