რუსთავში დევნილი ოჯახებისთვის თანამედროვე სტანდარტების შესაბამისი საცხოვრებელი კომპლექსი შენდება.

პროექტის ფარგლებში, 4 ახალაშენებულ საცხოვრებელ კორპუსში ბინას 800 დევნილი ოჯახი მიიღებს. ოჯახების განსახლება მომდევნო წელს იგეგმება.

დევნილთა სააგენტომ, რუსთავში, აღნიშნულ საცხოვრებელ კომპლექსში განსახლების მსურველი დევნილი ოჯახების მიერ შევსებული განაცხადების შეფასების პროცესი უკვე დაიწყო.

სამშენებლო სამუშაოებს ადგილზე გაეცნენ ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე გიორგი ცაგარეიშვილი და დევნილთა სააგენტოს დირექტორი დავით კაიკაციშვილი.

შეგახსენებთ, რომ 2025 წელს, სრულად გარემონტებული ბინები, ჯამში 1 614 დევნილ ოჯახს გადაეცა, მათ შორის, 762 ოჯახი თბილისში მიმდინარე თვეს განსახლდა. ამ ეტაპზე, რუსთავის პარალელურად, საცხოვრებელი კომპლექსები 3 ქალაქში - თბილისში, ზუგდიდსა და ბორჯომში შენდება.