აფხაზეთის მკვიდრის,უდიდესი ქართველი პოლიტიკოსის, დიპლომატისა და სახელმწიფო მოღვაწის აკაკი ჩხენკელის სახელობის აფხაზეთის ისტორიის კაბინეტი გაიხსნა.

კაბინეტის მუშაობის პრიორიტეტული მიმართულება აფხაზებსა და ქართველებს შორის ნდობის აღდგენისა და მშვიდობის მშენებლობის ხელშეწყობა იქნება. კაბინეტს სათანადო ფუნქციონირებისათვის გადაეცა საჭირო და იშვიათი გამოცემები აფხაზეთის ისტორიის, კულტურის, პოლიტოლოგიის საკითხებზე, ასევე დოკუმენტალური ფოტო მასალები .

კაბინეტის მნიშვნელობაზე ისაუბრეს უმაღლესი საბჭოს ხელმძღვანელმა პირებმა და უმაღლესი საბჭოს დეპუტატებმა, აფხაზეთის განათლებისა და კულტურის მინისტრმა ბექა ღვაჩლიანმა, ფოთის ადგილობრივი ადმინისტრაციისა და აფხაზეთის 21-ე საჯარო სკოლის წარმომადგენლებმა. შეხვედრის ბოლოს უმაღლესი საბჭოს თავმჯდომარემ, ჯემალ გამახარიამ წაიკითხა ლექცია აფხაზეთის თემაზე და შეკრებილ საზოგადოებას გააცნო კაბინეტის ფუნქციონირების პერსპექტივები.