საქართველოში ქრისტიანობის სახელმწიფო რელიგიად გამოცხადების 1700 წლის იუბილე მთელი ქვეყნის მასშტაბით კულტურული და შემოქმედებითი ღონისძიებებით აღინიშნება.

მესტიის კულტურისა და ხელოვნების ცენტრში გურამ ყურაშვილის სახელობის აფხაზეთის სახელმწიფო საგუნდო კაპელას შემოქმედებითი საღამო გაიმართა. ღონისძიება პროექტის „საქართველო – ქრისტიანული სახელმწიფო 1700“ ფარგლებში ჩატარდა, რომელიც საქართველოს კულტურის სამინისტროსა და „შემოქმედებითი საქართველოს“ მხარდაჭერით ხორციელდება და მიზნად ქვეყნის ქრისტიანული მემკვიდრეობისა და ეროვნული იდენტობის პოპულარიზაციას ისახავს.

საღამოს დაესწრო აფხაზეთის ა.რ. განათლებისა და კულტურის მინისტრის პირველი მოადგილე გური ბაქრაძე, რომელმაც საზოგადოებას სიტყვით მიმართა და კაპელას პროექტში აქტიური მონაწილეობა აღნიშნა. ღონისძიებას ასევე ესწრებოდნენ აფხაზეთის ა.რ. მთავრობის თავმჯდომარის წარმომადგენელი სამეგრელო–ზემო სვანეთის მხარეში ირაკლი ბაღათურია, მესტიის კულტურისა და ხელოვნების ცენტრის დირექტორი გეგი ფალიანი და საზოგადოების წარმომადგენლები.